МОСКВА – Аэрофлоттун Боинг-737 учагы Орусиянын борбордук Урал тоолорунда Пермь шаарына жакын жерде кулап түшкөнүн орусиялык маалымат агенттиктери жекшемби күнү өзгөчө кырдаалдар министрлигинин өкүлдөрүнө шилтеме берип кабарлады.
«Акыркы маалыматтар боюнча, учак шаарга жакын жердеги жарга кулап түшкөн. Учакта 82 жүргүнчү, андан тышкары бир наристе жана беш экипаж болгон жана алдын ала маалыматтар боюнча, алардын баары каза болгон», — деди тергөөчү Владимир Маркин РИА Новости агенттигине.
"Учак өрттөнүп, жарылып кеткен жана мындай жагдайда эч ким аман калат деген үмүт жок", — деп Интерфакс өзгөчө кырдаалдар министрлигинин өкүлдөрүнө шилтеме берип билдирди.
Бирок РИА Новостиге шилтеме берип министрликтин булагы учак турак үйлөрдөн бир нече метр алыстыкта кулап түшкөнүн, тергөөчүлөргө жардам берүү үчүн бардык аймак полиция тарабынан курчоого алынганын билдирди.
Учактын сыныктары төрт чарчы чакырымдай жерге чачылганын расмийлер билдиришип, жалын толугу менен өчүрүлгөнүн кошумчалашты.
"Учак Москванын Шереметьево аэропортунан жекшемби күнү саат 0112де (ишемби саат 2112) учуп чыккан, бирок ал конуп жатканда 1,800 метр бийиктикте аны менен байланыш үзүлүп калган", — деп мурдараак Интерфакс агенттигине министрликтин басма сөз катчысы Ирина Андрианова билдирген.
Учактын ичинде бардыгы болуп жети бала, анын ичинде бир ымыркай болгон, деп билдирди учакка ээлик кылган Орусиянын алдыңкы Аэрофлот авиакомпаниясынын өкүлү.
Аэрофлот кошумчалагандай, учакта чет элдик жарандар болгон эмес.
Кырсыктын себептери тактала элек, бирок РИА Новости булагы кыймылдаткычтын иштен чыгышы учакта жалын чыгып, кырсыкка алып келиши мүмкүн деп божомолдогон.
Өзгөчө кырдаалдар министри Сергей Шойгу кырсык тууралуу Орусиянын президенти Дмитрий Медведевге билдиргенин Кремлдин басма сөз кызматы билдирди.
Транспорт министри Игорь Левитин башында турган тергөө тобу жакын арада окуя болгон жерге учуп кетмекчи.
Өзгөчө кырдаалдар министрлиги окуя болгон жерге Москвадан куткаруу тобун жөнөтүүнү карап чыкты, бирок кийинчерээк "Пермде издөө-куткаруу миссиясын аткаруу үчүн жетиштүү каражат бар жана Москвадан адистерди жөнөтүүнү кийинкиге калтырууну чечти" деп билдирди.
Кырсыктан жабыркаган Транссибирь темир жолу Пермь менен Екатеринбургдун ортосундагы тилкеде үзүлүп, бардык поезддер айланма жолго чыкканын жергиликтүү полиция кызматкерлери билдирди.
Өткөн жылы 33 адамдын өмүрүн алып кеткен 318 орусиялык авиакырсык – 2005-жылга караганда алты эсеге көбөйгөн – Орусиянын жарандык авиациясына олуттуу кооптонууну жаратты, эксперттер экипаждардын профессионалдык даярдыгынын, ошондой эле Орусиянын эскилиги жеткен жүргүнчү учактар паркындагы чоң кемчиликтерди белгилешти.
Аба коопсуздугу боюнча комиссия январь айында өлкөнүн эл аралык авиалайнерлеринин орточо жашы 18, ал эми аймактык учактары 30 жаш экенин жарыялаган.
